«عەلا بەرکات» سیاسەتوانی سەربەخۆی کوردی سووریا لە گفتوگۆ لەگەڵ کوردپرێسدا ئاماژەی دا بە وتەکانی سوپای ڕووسیا لەبارەی ڕادەست کردنی عەین عیسا بە حکوومەتی ناوەندی لەلایەن هێزەکانی سووریای دیموکراتەوە و ڕایگەیاند: ئەم وتانە بۆ هەرانانەوەی میدیاییە، یەکینەکانی پاراستنی گەل (YPG) هیچ کاتێک خاوەنی ئیرادەی خۆیان نەبوونە.

ناوبراو درێژەی دا: یەپەگە لەژێر فەرمانی حکوومەتی ناوەندیی سووریا، ڕووسیا، تورکیا و پەکەکە-دا دەجووڵێت و بەپێی بڕیاری ئەوان هەڵسوکەوت دەکات.

عەلا بەرکات وتیشی: ئەوەی کە ڕووسیا داوای لێکردوون کە عەین عیسا چۆڵ بکەن جێبەجێ کردنی هەمان سیاسەتی بەکار گرتنە کە حکوومەتی ناوەندیی سووریا و ڕووسیا بەردەوام کەڵکی لێوەردەگرن و لەم نێوانەشدا تەنها هزری گشتی بەلاڕێدا دەبەن.

سیاسەتوانە کوردەکەی سووریا لەبارەی پێکدادانی دوو ڕۆژ بەر لە ئێستای چەکدارانی پەکەکە و پارتی کە گیان لەدەست دانی هێزێکی پێشمەرگەی ڕۆژی  لێکەوتەوە، دەڵێت: پەکەکە هیچ کات نەیویستووە هەرێمی کوردستان سەقامگیری و ئارامی بەخۆوە ببینێت و بۆ سەرکەوتنی خواستی بێگانەکان گوشاری خستۆتە سەر هەرێمی کوردستان.

ناوبراو پێشتر لەبارەی کاریگەریی هەڵبژاردنەکانی ئەمریکا لەسەر دۆخی کوردی سووریا بە کوردپرێسی ڕاگەیاندبوو: ئەنجامی سیاسەت کردنی دیموکراتەکان لەبارەی کوردەکانی سووریا باشتر بووە لە ئەنجامی سیاسەتی کۆمارییەکان و کورد هیوای بەمەیە پاش هاتنی دیموکراتەکان لە ئەمریکا بتوانن سیاسەتێکی ڕاستەقینەتر پەیڕەو بکەن.

بەرکات وتیشی: هەڵبەت هەر سەرۆکێک کە لە ئەمریکا دەسەڵاتی بەدەستەوە بێت ئەگەر کورد لەناوخۆدا یەکگرتوو نەبن بێ بایەخ دەبێت.

سیاسەتوانە کوردەکەی سووریا جەختیشی کردەوە: ئەگەر کوردی سووریا نەگەنە ڕێککەوتن هەر هەنگاوێک کە بۆ چارەسەر کردنی پرسی کوردی سووریا هەڵبگیردرێت ناگاتە ئەنجام.

کۆدی هەواڵنێر: 60113